'संभाजीराजे बोलतायत ते १०० टक्के चूक, मी वाचलं...' वाघ्या कुत्र्याच्या स्मारकास भिडे गुरुजींचे समर्थन

रायगडवरील वाघ्या कुत्र्याच्या स्मारकाला संभाजीराजे छत्रपती यांनी विरोध केला आहे. ते स्मारक तिथून हटवण्यात यावे अशी भूमिका त्यांनी घेतली आहे. त्यावरुन ओबीसी समाज आणि धनगर समाजानानेही आक्रमक भूमिका घेत स्मारक हटवण्यास विरोध केला होता. आता संभाजी भिडे गुरुजींनी संभांजीराजेंना चूकीचे ठरवत वाघ्या कुत्र्याच्या स्मारकाला समर्थन दिले आहे.

काय म्हणाले भिडे गुरूजी?

संभाजी भिडे गुरूजींनी वाघ्या कुत्र्याच्या स्मारकासंबंधी भूमिका घेत म्हटले की, संभाजीराजे भोसले बोलतात ते १०० टक्के चुक आहे. वाघ्या कुत्र्या बाबत मी वाचलं आहे आणि ती कथा सत्य आहे. वाघ्या कुत्र्याने चितेत उडी घेतली हे सत्य आहे, त्यामुळे स्मारक म्हणून ते केलं आहे. माणसं एकनिष्ठ नसतात,तेवढी कुत्री असतात, निदान आताच्या युगात देशाशी एकनिष्ठ राहायचे आहे,याचे द्योतक म्हणून वाघ्या कुत्र्याचे स्मारक तिथंच पाहिजे.

छत्रपती शिवाजी महाराज हे हिंदुत्ववादी होते

छत्रपती शिवाजी महाराज हे सर्वधर्मसमभावी होते का या प्रश्नावर उत्तर देताना भिडे गुरूजी म्हणाले की, ते नव्हते, आम्ही चिकटवलंय, छत्रपती शिवाजी महाराज हे हिंदुत्ववादी होते.शहाजीराजे असे बोलले होते की, मला हिंदवी स्वराज्य स्थापन करायचं आहे. स्वतंत्र राज्य निर्माण करायचं आहे. आदिलशाही, निजामशाही, कुतुबशाही, मुघल, डच, फ्रेंच, पोर्तुगीज, इंग्रज,सिद्धी हाप्शी, या सर्व परकीय आक्रमकांनी सगळा देश खाऊन टाकलायं. हिंदूची संस्कृती रक्षणासाठी मला हिंदूंची सत्ता म्हणजे हिंदवी स्वराज्य निर्माण करायचं आहे. याचे पुस्तकात पुरावे आहेत. आत्ताचे व्याख्याते आपल्या वक्तव्यातून महाराजांचा उपयोग आपल्या आपल्या सोयीसाठी वापरतात.