...तर शिवसेना (उबाठा)व काँग्रेसला विरोध करणार : महादेव जानकर 

खामगाव : आमचं लक्ष केवळ दिल्लीची संसद आहे. राज्यात आम्हाला रस नाही. त्यामुळे पक्षाकडून लोकसभा निवडणूक लढवली जाणार आहे. सध्या एकला चलो रे ची भूमिका असली तरी रा.काँ शरदचंद्र पवार गटाने एक जागा देऊ केली. त्याचा विचार केल्यास इतर जागांवर असलेल्या- शिवसेना (उबाठा), काँग्रेसच्या उमेदवारांसमोर निवडणूक लढवली जाईल, असे राष्ट्रीय समाज पक्षाचे नेते महादेव जानकर यांनी सांगितले. खामगाव येथे आले असता त्यांनी पत्रकारांशी संवाद साधला.

शासकीय विश्रामगृहात पक्ष पदाधिकाऱ्यांनी महादेव जानकर यांचा सत्कार केला. यावेळी जानकर यांनी लोकसभा निवडणूकिबाबत भूमिका मांडली. पक्षासाठी लोकसभा निवडणूक महत्त्वाची आहे. राज्याच्या निवडणुकीचा विचारच करत नाही. दिल्ली काबीज करण्यासाठी आमची वाटचाल आहे. ही निवडणूक लढण्यासाठी अद्याप कोणाशी बोलणी झालेली नाही. महायुती किंवा महाविकास आघाडीकडून लढण्यासाठी जागांच्या संदर्भात कोणतीही बोलणी झाली नाही. त्यामुळे आमची एकला चलो रे ही भूमिका आहे. या दौऱ्यात चांगली माणसे मिळत आहेत. त्यामूळे पक्षाचे बळही वाढत आहे.