कर्नाटकचे माजी मुख्यमंत्री व विरोधी पक्षनेते सिद्धरामय्या देखील कोरोना बाधित...

माजी मुख्यमंत्री व विरोधी पक्षनेते सिद्धरामय्या देखील कोरोना बाधित...

कर्नाटक / बेंगलुरु (प्रतिनिधि) : देशभरात कोरोनाने थैमान घातले असून सर्वसामान्य ते अनेक सेलिब्रेटी,राजकीय नेते हे देखील या विषाणूच्या विळख्यात अडकले आहेत. कर्नाटक विधानसभेतील विरोधी पक्षनेते आणि माजी मुख्यमंत्री सिद्धरामय्या यांना देखील कोरोनाची लागण झाली आहे. ते ७१ वर्षीय असून त्यांना रुग्णालयात दाखल करण्यात आले आहे. त्यांची प्रकृती स्थिर असून देखरेख ठेवली जात आहे. अशी माहिती मणीपाल रुग्णालयाने निवेदनात दिली. 

धनगर / कुरुबा समाजातुन आलेले सिद्धरामय्या हे मास लीडर म्हणून ओळखले जातात. ते काँग्रेसचे दिग्गज नेते आहेत. ते देशातील पाहिले मुख्यमंत्री आहेत की जे धनगर समाजातुन आलेले आहे. सिद्धरामय्या यांनी २०१३ ते २०१८ या काळात कर्नाटकच्या मुख्यमंत्रीपदाचा कारभार सांभाळला असून सद्या ते विरोधी पक्षनेतेपदाची धुरा सांभाळत आहेत.

विरोधी पक्षनेते आणि माजी मुख्यमंत्री सिद्धरामय्या यांनी ट्विट करत कोरोनाची लागण झाल्याचे सांगितले. “माझी कोव्हिड चाचणी पॉझिटिव्ह आली आहे. खबरदारी म्हणून डॉक्टरांच्या सल्ल्याने मला रुग्णालयात दाखल करण्यात आले आहे. माझ्या संपर्कात आलेल्या सर्वांना मी लक्षणे तपासण्याची आणि स्वत:ला क्वॉरन्टाईन ठेवण्याची विनंती करतो” असे ट्वीट सिद्धरामय्या यांनी केले आहे. 

सिद्धरामय्या यांच्या मुलाने सांगितले, वडिलांना सोमवारी ताप आला होता. त्यानंतर कोरोना अँटिजन चाचणी केली. ज्यात त्यांचा कोरोना अहवाल पॉझिटीव्ह आला. कर्नाटकमधील कोरोना विषाणूच्या विळख्यात सापडलेले सिद्धरामय्या हे दुसरे मोठे नेते आहे, याआधी भाजप नेते मुख्यमंत्री बीएस येडियुरप्पा हेही कोरोनाच्या विळख्यात सापडले आहे.

मुख्यमंत्री बीएस येडियुरप्पा यांनी कन्नडमध्ये सिद्धरामय्या यांना टॅग करून एक ट्विट केले, “पूर्व मुख्यमंत्री आणि विरोधी पक्षाचे नेते सिद्धरामय्या यांची कोरोना संक्रमित विषयी बातमी ऐकून हैराण झालो. माझ्या शुभेच्छा तुमच्यासोबत आहे, तुम्ही लवकरच बरे होऊन लोकांच्या सेवेत रुजू व्हाल"